Тошкент, Ўзбекистон — Жорий йилнинг 11 апрель куни Ўзбекистон Республикаси инвестициялар, саноат ва савдо вазири ўринбосари Шоҳруҳ Гуламов ва М42 (БАА) компанияси вице-президенти Холид Ал-Зааби ўртасида учрашув бўлиб ўтди.
М42 — БААдаги энг йирик генетика компаниясидир. 2023 йилда ташкил этилган. М42 Геномика ва сунъий интеллект каби инновацион технологиялардан фойдаланган ҳолда касалликларни ташхислаш, даволаш ва олдини олиш каби кенг кўламли соғлиқни сақлаш хизматларини тақдим этади.
Учрашув давомида томонлар Ўзбекистонда генетик лаборатория ташкил этиш лойиҳасини амалга оширишнинг турли моделларини муҳокама қилдилар. Лойиҳа касалликларга генетик мойилликни аниқлаш, мамлакатимизда биомаркерлар ва скрининг усулларидан кенг фойдаланиш бўйича илғор тиббий амалиётларни жорий этишга қаратилган. Шунингдек, у илмий ҳамкорликни ривожлантириш, БААда ўзбек мутахассисларини ўқитишни ташкил этиш ва илғор тажриба алмашишни назарда тутади.
