Тошкент, Ўзбекистон — Хитойнинг Турфан шаҳрида бўлиб турган Сирдарё вилояти делегацияси бугун қишлоқ хўжалигида сувни тежаш, ҳосилдорликни ошириш ва замонавий агротехнологияларни амалиётга жорий этиш бўйича қатор объектлар фаолияти билан танишди.
Вилоят ҳокими Эркинжон Турдимов бошчилигидаги делегация дастлаб Оловтоғ шаҳарчаси Бодом қишлоғидаги тарвуз етиштириш майдонларида бўлиб, юқори самарали сув тежовчи технологиялар асосида ташкил этилган агролойиҳаларни кўздан кечирди.
Шундан сўнг Санбао шаҳарчасидаги Афанди қишлоғида полиз экинлари, хусусан тарвуз ва қовун етиштиришда қўлланилаётган замонавий ёндашувлар, томчилатиб суғориш тизимлари ва ҳосилдорликни ошириш усуллари муҳокама қилинди.
Куннинг иккинчи ярмида делегация Яэр шаҳарчасидаги интеллектуал сув тежовчи узумчилик намойиш боғида бўлиб, рақамли бошқарув, намлик назорати ва сув сарфини минималлаштиришга қаратилган ечимлар билан танишди.
