Тошкент, Ўзбекистон — 26 февраль куни Тошкентда икки мамлакат ишбилармонлари ўртасида савдо-иқтисодий ҳамкорликни мустаҳкамлашга қаратилган Ўзбекистон – Покистон бизнес-форуми бошланди.
Тадбирда давлат ва ишбилармон доиралари вакиллари, жумладан, Президент ҳузуридаги Тадбиркорликни қўллаб-қувватлаш бўйича жамоатчилик кенгаши вакиллари, Ўзбекистон ва Покистоннинг етакчи ишбилармонлари иштирок этмоқда.
Форум доирасида Ўзбекистоннинг инвестицион салоҳияти, жумладан, қўшма лойиҳалар учун истиқболли йўналишлар ва хорижий инвесторлар учун имкониятлар тақдим этилди. Шунингдек, икки мамлакат тадбиркорлари учун ҳамкорликнинг янги имкониятларини муҳокама қилиш ва бизнес алоқаларини ўрнатиш имконини берувчи B2B учрашувлари ўтказиш режалаштирилган.
Покистон делегацияси турли соҳалардаги ишбилармонлардан иборат бўлиб, жумладан, тўқимачилик саноати, қурилиш материаллари ишлаб чиқариш, чарм-пойабзал саноати, озиқ-овқат саноати, логистика ва транспорт соҳаларини қамраб олган.
