Тошкент, Ўзбекистон — Тошкент шаҳар ҳокими Шавкат Умурзаков "Рох Group" (Ветнам) компанияси асосчиси Туан Чан билан учрашув ўтказди. Учрашувда "Тошкент Invest" АЖ бошқарув раиси Баҳром Шакиров, раис ўринбосари Рустам Қодиров, Тошкент шаҳар инвестициялар, саноат ва савдо бошқармаси бошлиғининг биринчи ўринбосари Азизхон Шавкатов ҳамда бошқа мутасаддилар иштирок этдилар.
Шавкат Умурзаков Тошкент шаҳрини ривожлантиришнинг стратегик манзарасини тақдим этди. Бунда у қулай инвестиция муҳитини яратиш, "яшил" энергетикани ривожлантириш ва энергия ресурслари мустақиллигига эришишга алоҳида эътибор қаратди. Пойтахтнинг йирик жаҳон брендларини жалб этишдаги ютуқлари алоҳида таъкидланди. Бу эса шаҳар иқтисодий сиёсатига бўлган ишончнинг юқори даражада эканлигидан далолат беради.
Аҳолининг тез суръатлар билан ўсиши ва уй-жой фондини кенгайтиришга алоҳида эътибор берилди. Шу билан бирга, иш ўринлари сезиларли даражада кўпайгани, фуқароларнинг тўлов қобилияти мустаҳкамлангани ва ялпи ички маҳсулот ўсгани қайд этилди. Ҳоким иқтисодиёт барқарорлигини ошириш учун кичик ва йирик бизнесни қўллаб-қувватлаш, шунингдек, хом ашёни маҳаллийлаштириш муҳимлигини таъкидлади.
Учрашув якунида томонлар "Рох Group" компанияси "Тошкент Invest" ваколатли ходимлари билан ҳамкорлик йўналишларини ишлаб чиқишни давом эттиришга келишиб олдилар.
