Тошкент, Ўзбекистон — 2024 йилнинг 11 декабрь куни Тошкентдаги “First Dry Port Terminal” МЧЖ терминалларидан Бразилияга илк блок-поэзд жўнаб кетди.
LogiStan хабарига кўра, поэзд таркибида ҳар бирида 28 тонна карбамид бўлган 54 та қирқ футлик контейнер мавжуд.
Поэзд маршрути Ўзбекистон, Туркманистон, Озарбайжон ва Грузия орқали ўтади. Грузиянинг Поти портида контейнерлар кемага юкланиб, Бразилиянинг Паранагуа портига денгиз орқали етказилади, дея маълум қилди First Dry Port Ter вакили.
Юк жўнатувчи Ўзбекистоннинг кимё саноатида экспорт-импорт операцияларининг ягона агенти бўлган "Узкимёимпекс" компаниясидир.
Етказиб беришнинг тахминий муддати 60–70 кунни ташкил этади. Контейнерлар Ўзбекистондан Поти портигача 20 кунда етказилади, денгиз орқали эса 35–45 кун давом этади.
