Тошкент, Ўзбекистон — Ўзбекистон Марказий банки 2025 йилда тўлов QR-кодлари учун ягона стандартларни жорий этишни режалаштирмоқда. Бу мамлакатда нақдсиз тўловларни амалга ошириш жараёнини соддалаштиради. Бу ҳақда Марказий банк Тўлов тизимлари департаменти директори ўринбосари Миразиз Мирҳаётов маълум қилди.
Ҳозирда савдо нуқталарда турли сервислар учун бир нечта турли хил QR-кодлар қўлланилади, бу эса харидорлар учун ноқулайликлар туғдиради. Марказий банк универсал стандартни ишлаб чиқишни мақсад қилган, у орқали мижозлар ташкилотда ўрнатилган ягона QR-код орқали исталган мобиль илова ёки тўлов сервисидан фойдаланиб, тўловни амалга оширишлари мумкин бўлади.
«Биз ягона стандарт яратмоқчимиз. Ташкилотда битта QR-код ўрнатилади ва мижоз уни орқали истаган мобиль илова ёки тўлов сервисидан фойдаланиб, тўловни амалга ошириши мумкин бўлади», — деди Мирҳаётов. Бу ташаббусни амалга ошириш учун бир йил вақт талаб этилади.
Марказий банк маълумотларига кўра, 2024 йилда 108 мингдан ортиқ тадбиркор индивидуал QR-кодларга эга бўлган. QR-код орқали амалга оширилган тўловлар ҳажми 31 фоизга ошиб, 441,79 миллиард сўмни ташкил этган.
QR-кодлардан фойдаланиш афзалликлари қаторида POS-терминаллар ўрнатиш заруратининг йўқлиги сабабли бизнес харажатларининг камайиши, шунингдек, тизим интеграцияси орқали автоматик равишда солиқ кешбекларини қайтариш имконияти мавжуд.
