Тошкент, Ўзбекистон — IT Park Uzbekistan вакиллари Япониянинг “Digital Knowledge” компанияси бош директори Ногучи Ясуюки билан учрашув ўтказди. “Digital Knowledge”IT Park Uzbekistanнинг асосий ҳамкорларидан бири ҳисобланади — Ўзбекистоннинг Япония бозорида танилишини ошириш, Япония компанияларини Ўзбекистонга жалб этиш мақсадида биргаликда тадбирлар ташкил этилмоқда.
Бундан ташқари, “Digital Knowledge” Ўзбекистонда IT соҳасида мутахассислар тайёрлайдиган ва уларга япон тилини ўргатадиган “Japan Digital University”ни ташкил этган. Университет, шунингдек, битирувчиларга Ўзбекистонда ўз офисларини очаётган Япония компанияларида иш топишга кўмаклашади ва шу тариқа икки томонлама ҳамкорликни ривожлантиришга ҳисса қўшади.
Учрашувнинг асосий мавзуларидан бири Токиода IT Park ваколатхонасининг очилиши бўлди. Янги ваколатхона “Digital Knowledge” биносида жойлашади. Бу воқеа икки мамлакат IT соҳалари ўртасидаги алоқаларни мустаҳкамлашда муҳим қадам бўлади.
Музокаралар давомида “Digital Knowledge” вакиллари очилиш маросимини, шунингдек, Токиода бўлиб ўтадиган “Uzbekistan Outsourcing Conference” (UOC)ни ўтказишда ёрдам беришга тайёр эканликларини билдирдилар. Бундан ташқари, Япония компанияларини Ўзбекистон IT-бизнеси билан ҳамкорликка жалб қилишга қаратилган истиқболли ташаббуслар муҳокама қилинди. Бу ҳамкорлик имкониятларини кенгайтириш ва қўшма лойиҳалар сонини кўпайтириш имконини беради.
Март ойида ваколатхона очилишига тайёргарлик кўриш учун IT Park делегацияси Японияга ташриф буюради. Ташриф доирасида Токио, Осака ва Нагоя шаҳарларида Япония IT-компаниялари вакиллари билан учрашувлар, шунингдек, ишбилармонлик алоқаларини мустаҳкамлаш ва ҳамкорликнинг янги йўналишларини излашга қаратилган музокаралар режалаштирилган.
Японияда IT Park ваколатхонасининг очилиши халқаро ҳамкорликни ривожлантиришда стратегик жиҳатдан муҳим босқич бўлади. Янги ваколатхона Ўзбекистон IT-компаниялари учун қўшимча имкониятлар яратади, Япония билан ҳамкорлик алоқаларини мустаҳкамлайди ва аутсорсинг соҳасидаги ҳамкорликни янги босқичга олиб чиқишга хизмат қилади.
2025 йил 24 апрель куни Токиода “Uzbekistan Outsourcing Conference” тадбири бўлиб ўтади.
