Тошкент, Ўзбекистон — 16 январь куни ижтимоий тармоқларда Тошкентдаги Чорсу бозорида эркакнинг касал мол жигари сотаётганини кўрсатган видео тарқалди.
Санитария-эпидемиология хизмати ушбу ҳолатга тезкор жавоб бериб, бозор ҳудудида текширув ўтказди. Натижада, хавфли маҳсулотнинг тўққиз килограмми мусодара қилиниб, йўқ қилинди.
Чорсу бозорида мунтазам равишда гўшт маҳсулотларини санитария экспертизасидан ўтказувчи лабораториялар фаолият юритади. Бироқ, сотувчи тегишли текширувдан ўтмаган ва носанитария шароитида сақланган жигарни сотувга қўйган.
Видеода эркак касал жигарни сотаётганини тан олган ва бунинг зарарли эмаслигини таъкидлаб, «бундан ҳеч ким ўлмайди», деган.
Мазкур ҳолатга жавобан Санэпидқўмита харидорларга маҳсулотни сотиб олаётганда ветеринария-санитар текширувдан ўтганини тасдиқловчи ҳужжатларни талаб қилишдан тортинмасликни тавсия қилди.
