Тошкент, Ўзбекистон —Ўзбекистонда умумтаълим муассасаларида энергия тежамкорлик асослари ўқитилади. Бу ҳақда мактабгача ва мактаб таълими вазири Хилола Умарова «Ўзбекистон 24» телеканалига берган интервьюсида маълум қилди.
Ушбу ташаббус ёш авлодда энергия ресурсларидан оқилона фойдаланиш маданиятини шакллантиришга қаратилган. Мактаб дастурларига, жумладан, «Тарбиявий соатлар», «География» ва «Физика» фанларига табиий ресурсларни тежашга оид мисоллар киритилади.
Хилола Умарованинг таъкидлашича, Ўзбекистон техник тартибга солиш агентлиги билан ҳамкорликда энергия тежамкорлик бўйича амалий тавсиялар жамланган буклетлар ишлаб чиқилган. Улар япон тажрибаси асосида мослаштирилган.
Эслатиб ўтамиз, 19 февраль куни президент Шавкат Мирзиёев энергия самарадорлигини ошириш бўйича таклифлар билан танишган эди.
