Тошкент, Ўзбекистон — Экология ва иқлим ўзгариши миллий қўмитаси Давлат экологик назорат инспекциясининг Сирдарё сув ҳавзасини назорат қилиш бўлими ҳамда Қолғансир давлат ўрмон-овчилик хўжалиги ходимлари томонидан Сирдарё вилояти ДХХ ва ИИБ ходимлари билан ҳамкорликда «Шоликор» сув истеъмолчилари уюшмаси ҳудуди, Қолғансир давлат ўрмон-овчилик хўжалигига чегарадош ҳудудда навбатдаги рейд тадбири ўтказилди.
Рейд давомида 4 нафар фуқаро ўзларига тегишли ов қуроллари ёрдамида 9 дона ёввойи ўрдакни ҳеч қандай рухсатномасиз ноқонуний равишда овлаганлиги аниқланди.
Ҳолат юзасидан ҳуқуқбузарларнинг ҳар бирига базавий ҳисоблаш миқдорининг 20 баравари, яъни 8 миллион 240 минг сўмдан, жами 32 миллион 960 минг сўм миқдорида жарима тайинланди.
Шунингдек, табиатга 3 миллион 708 минг сўм зарар етказилганлиги маълум бўлди. Ҳуқуқбузарлардан етказилган зарар ва жарима ундирилиши белгиланди.
Ёввойи ҳайвонот дунёсини муҳофаза қилишга қаратилган рейд тадбирлари давом эттирилмоқда.
