Тошкент, Ўзбекистон — АҚШнинг Невада штатининг Лас-Вегас шаҳрида профессионал бокс мусобақаси бўлиб ўтди. Жанглардан бирида ўзбекистонлик боксчи Бектемир Мелиқўзиев навбатдаги ғалабасини қўлга киритди. У суперўрта вазн тоифасида Гана вакили Сена Агбеко билан тўқнаш келди.
Биринчи раундёқ Мелиқўзиев бош билан берилган зарбадан кейин қошидан ёриқ олди. Шунга қарамасдан, у жангни давом эттириб, баҳс жараёнини ишонч билан назорат қилди. Еттинчи раундда ўзбекистонлик боксчи рақибини техник нокаутга учратди. Шу тариқа, Мелиқўзиев WBA версияси бўйича интерконтинентал чемпионлик унвонини муваффақиятли ҳимоя қилди.
Жангдан сўнг боксчи ўзининг асосий мақсади жаҳон чемпионлик камарини қўлга киритиш эканини билдирди. Унинг сўзларига кўра, у чемпионлик жангини ўтказишга тўлиқ тайёр ва яқин вақт ичида ушбу унвонни Ўзбекистонга олиб келишга умид қилмоқда.
