Тошкент, Ўзбекистон — “Visual Capitalist“ мамлакатлар ЯИМ кўрсаткичлари харид қобилияти паритетига (ППП) мослаштирилган ҳолда таққосланган глобал иқтисодиётнинг визуализациясини эълон қилди. Халқаро валюта жамғармаси баҳоларига кўра, 2026 йилда жаҳон иқтисодиётининг умумий ҳажми ППП ҳисобида қарийб $219 трлнни ташкил этади.
Иқтисодиётларни ППП асосида таққослаганда глобал рейтинг номинал ЯИМга қараганда анча бошқача кўринади. Номинал ЯИМ бўйича дунёдаги энг йирик иқтисодиёт АҚШ бўлсада, ППП ҳисобида Хитой амалда 2014 йилдан буён дунёнинг етакчи иқтисодиёти ҳисобланади. Бугунги кунда Хитой иқтисодиёти $43,5 трлнга баҳоланмоқда, бу АҚШнинг $31,8 трлн кўрсаткичидан анча юқоридир.
Бироқ Хитой дунёнинг энг йирик иқтисодиётлари қаторида Осиёни ифодалаётган ягона давлат эмас. Ҳозирда Осиё мамлакатлари жаҳон иқтисодиётининг 49%ини таъминлаб, қитъанинг халқаро савдо ва ишлаб чиқаришнинг янги маркази сифатидаги мавқеини мустаҳкамламоқда.
Ҳиндистон ППП бўйича дунёдаги учинчи йирик иқтисодиёт бўлиб, унинг ЯИМи $19,1 трлнни ташкил этади. Шунингдек, Япония ($6,9 трлн), Индонезия ($5,4 трлн) ва Жанубий Корея ($3,5 трлн) ҳам нисбатан арзон яшаш харажатлари туфайли номинал ЯИМга нисбатан бир неча триллион долларга юқори натижани кўрсатмоқда.
2026 йил баҳоларига кўра, Ўзбекистон дунёда 55-ўринни эгаллайди, иқтисодиёт ҳажми эса тахминан $511 млрд (ППП)ни ташкил этади. Глобал рейтингда Ўзбекистон Португалия ($556 млрд), Дания ($529 млрд) ва Греция ($485 млрд) каби давлатлар билан ёнма-ён жойлашади.
