Тошкент, Ўзбекистон — 4 март куни Озарбайжон Президенти Илҳом Алиев Россиянинг «Татнефть» компанияси бош директори Наил Маганов, Қозоғистоннинг «ҚазМунайГаз» компанияси бошқарув раиси Асхат Хасенов ва Ўзбекистоннинг «Ўзбекнефтгаз» компанияси бошқарув раиси Баҳодиржон Сидиқов билан учрашув ўтказди.
Озарбайжон раҳбари кўп томонлама ҳамкорликнинг янги босқичи бошланганини таъкидлаб, унга тайёргарлик муваффақиятли олиб борилганини қайд этди. Шунингдек, у Озарбайжон, Россия, Қозоғистон ва Ўзбекистон нефть компаниялари ўртасидаги мустаҳкам ишлаб чиқариш алоқалари мавжудлигини эътироф этиб, бир қатор икки томонлама лойиҳалар амалга оширилаётганини ва бу борадаги ҳамкорликни янада кучайтириш зарурлигини таъкидлади.
Илҳом Алиев дўстона мамлакатлар учун қўшма ишлаб чиқариш ва буюртмаларни бажаришда тўрт томонлама ҳамкорликнинг муҳим аҳамиятга эга эканини алоҳида қайд этди.
Учрашув давомида янги ҳамкорлик формати истиқболлари муҳокама қилиниб, унинг келгуси ривожи ва давлатлар ўртасидаги иқтисодий алоқаларни мустаҳкамлаш борасида ишонч билдирилди.
Томонлар қуйидаги масалаларда ҳамкорлик қилиш ниятини билдирди:
– Фавқулодда ҳолатларни бартараф этиш;
– Қўшма оператив гуруҳларни ташкил этиш;
– Рақамли технологиялар ва дастурий ечимларни такомиллаштириш;
– Харид жараёнларини оптималлаштириш;
– Турли саноат тармоқларини ривожлантиришга кўмаклашиш.
Шунингдек, ушбу ҳамкорлик формати бошқа хорижий компаниялар учун ҳам очиқ эканлиги таъкидланди.
