Тошкент, Ўзбекистон — Тошкент вилояти ҳокими Зойир Мирзаев Покистоннинг гўштни қайта ишлаш ва экспорт қилишга ихтисослашган етакчи компанияларидан бири Zenith Associate компанияси вакиллари билан учрашди.
Компания асосан, юқори сифатли гўшт маҳсулотларини халқаро санитария-гигиена талаблари ва «Ҳалол» стандартлари асосида тайёрлаб, уларни жаҳон бозорларига экспорт қилиш билан шуғулланади. Компания маҳсулотлари йирик савдо тармоқлари ҳамда озиқ-овқат саноати корхоналарига B2B форматда етказиб берилади.
Мулоқотда икки томонлама ҳамкорлик алоқаларини ўрнатиш, замонавий услубда гўштни қайта ишлаш ва қадоқлаш лойиҳасини амалга ошириш имкониятлари муҳокама қилинди.
Ўз навбатида, Тошкент вилоятида чорвачилик салоҳияти, инвестициявий муҳит, хорижлик тадбиркорлар учун яратилган шароит ва имтиёзлар ҳақида батафсил маълумот берилди.
Таъкидланганидек, вилоятда 150 минг гектардан ортиқ чорвачилик учун мўлжалланган озиқа ер майдонлари мавжуд бўлиб, шунинг 50 минг гектари суғориладиган ерлар сифатида ажратилган. Шу билан бирга, ҳудудда йилига 200–230 минг тонна атрофида гўшт етиштирилади ва ҳар йили қарийб 10 минг бош наслли чорва моллари импорт қилинади.
Шундан келиб чиқиб, Тошкент вилоятида сифатли ва халол стандартларга тўлиқ жавоб берадиган замонавий қурбонхоналар ҳамда гўштни қайта ишлашга ихтисослашган чорвачилик комплексини ташкил этиш ташаббуси илгари сурилди.
Zenith Associate компанияси вакиллари эса, бу таклифга қизиқиш билдирди ва ҳамкорлик ўрнатишга тайёр эканликларини маълум қилди.
Учрашувдан сўнг, вилоятимиз делегацияси компания фаолияти, чорва молларини етиштириш, гўштни сақлаш, қайта ишлаш ва қадоқлаш технологиялари билан таништирилди.
