Тошкент, Ўзбекистон — Божхона қўмитаси Раиси А.Мавлонов бошчилигидаги делегация хорижий сафарини Сингапурда давом эттирди.
Ташрифнинг асосий тадбири – Сингапур божхона хизмати раҳбари Хунг Тан билан учрашув бўлди.
2023 йилда иккала давлат раҳбарларининг учрашувлари Ўзбекистон ва Сингапур ўртасидаги ҳамкорлик алоқаларини янги босқичга олиб чиқди.
Натижада, 2024 йилнинг ўзида мамлакатларимиз ўртасидаги ташқи савдо айланмаси 31 фоизга ошиб, салкам 120 млн. АҚШ долларини ташкил қилди.
“Ақлли божхона” тамойили бўйича Сингапур ўз тажрибасига эга ва бунда сунъий интеллектдан фойдаланиш самарали йўлга қўйилган.
Шу боисдан ҳам Сингапур Жахон банкининг логистика самарадорлиги рейтингида (LPI) биринчи ўринни эгаллаб келмоқда.
Сингапурнинг TradeNet дастури савдо жараёнларини оптималлаштириш учун яратилган дунёдаги биринчи миллий “Ягона ойна” дастурларидан ҳисобланади.
Савдо ва логистика операцияларини бирлаштириш ва соддалаштириш учун мўлжалланган замонавий рақамли экодастур 2018 йилда ишга туширилган.
Мазкур тизим кўмагида божхона юк декларациялари ўртача 10 дақиқада расмийлаштирилади. Сингапур божхонасида дастлабки декларациялаш даражаси 80-90 фоизни ташкил этади. Бу эса тадбиркорларнинг вақти ва харажатларини қисқартириб, уларга қулай шарт шароитлар яратади.
Шу боисдан учрашувда энг аввало божхона тартиботлари билан боғлиқ йўналишларда жорий қилинган сунъий интеллект технологиялари ҳамда унинг ишлаш механизмлари юзасидан ўзаро тажриба алмашиш, келгусида ушбу йўналишда онлайн учрашувларни мунтазам ташкил қилиш таклифи илгари сурилди.
Учрашувда пойтахтимиздаги Божхона институти ва Сингапур божхона академияси ўртасида ҳамкорликни йўлга қўйиш масалалари ҳам атрофлича муҳокама қилинди.
Делегация аъзолари шу куннинг ўзида Сингапурдаги энг йирик “Пасир Панжанг” ўтказиш пункти фаолиятини ҳам кўздан кечиришди.
