Тошкент, Ўзбекистон — Тошкент шаҳрида Ўзбекистон ва Туркия ўртасидаги савдо-иқтисодий ҳамкорлик бўйича Ҳукуматлараро комиссиянинг 7-йиғилишида белгиланган топшириқларни бажаришга бағишланган Ишчи гуруҳ йиғилиши бўлиб ўтди.
Муҳокамаларда икки давлатнинг тегишли вазирлик ва идоралари вакиллари иштирок этди.
Туркия делегациясига мамлакат Савдо вазирлигининг департамент директори Ҳакки Бурунджу раҳбарлик қилди. Ўзбекистон томонидан иқтисодиёт ва молия вазирлиги мутахассислари, шунингдек, бошқа тегишли идоралар ва тармоқ ташкилотлари вакиллари иштирок этди.
Йиғилиш давомида «Ҳаракатлар режаси»да белгиланган вазифаларни амалга ошириш ҳолати батафсил таҳлил қилинди. Томонлар турли соҳалардаги мавжуд тўсиқларни бартараф этиш ва режалаштирилган лойиҳаларни тезроқ амалга ошириш бўйича аниқ таклифлар билдиришди.
Шунингдек, томонлар жорий йилда Тошкентда бўлиб ўтадиган Ҳукуматлараро комиссиянинг 8-йиғилиши ва Бизнес-форумга тайёргарлик кўриш бўйича кейинги қадамларни белгилаб олишди.
Йиғилиш якунида томонлар икки томонлама ҳамкорликни мустаҳкамлашга тайёрлигини тасдиқладилар ва белгиланган мақсадларга эришиш учун тизимли ишларни давом эттиришга келишиб олдилар.
