Тошкент, Ўзбекистон — Хитойнинг Пекин шаҳрида "Ўзбекистон – Хитой" савдо-иқтисодий ва инвестиция форуми бўлиб ўтмоқда. Форумда Фармацевтика тармоғини ривожлантириш агентлиги директори А.Азизов бошчилигидаги делегация ҳам иштирок этиб, бир қатор учрашувлар ўтказди.
China Meheco Group Co., Ltd билан учрашувда:
Ўзбекистоннинг фармацевтика соҳасидаги имкониятлари, фармацевтика эркин иқтисодий зоналардаги яратилган шароитлар ва маҳаллий ишлаб чиқаришни рағбатлантиришга қаратилган таклифлар билан таништирилди;
Ўзбекистонда инсулин, субстанциялар ва оралиқ аралашмалар ишлаб чиқариш истиқболлари муҳокама қилинди;
Хитой компанияси томонидан Ўзбекистонлик фармацевтика мутахассисларини Хитойда ўқитиш ва тажриба алмашиш таклифлари берилди.
China National Biotec Group Co. Limited (Sinopharm) билан музокараларда:
Ўзбекистонда турли касалликларга қарши вакциналар ишлаб чиқиш лойиҳаси;
Маҳаллий ҳамкорларни аниқлаш, қўшма ишлаб чиқариш қувватларини ташкил этиш ва сармоя киритиш имкониятлари муҳокама қилинди.
Тянцзин фан ва технология университети тадбиркорлик технологиялари маркази раиси Чжан Баовеи билан учрашувда Ўзбекистонга Хитой фармацевтика компанияларини жалб этиш, лабораторияларни жиҳозлаш ва асбоб-ускуналар билан таъминлаш масалалари кўриб чиқилди. Лойиҳалар Хитой грантлари асосида амалга оширилиши режалаштирилмоқда.
