Тошкент, Ўзбекистон — “UTK International Logistics Co. Ltd.” Ўзбекистон-Хитой компанияси Хитойдан Тожикистонга биринчи блок поездини йўлга қўйди, деб хабар беради «UTK International Logistics Co. Ltd.» матбуот хизмати.
Мазкур поезд таркиби халқ истеъмоли маҳсулотлари ҳамда қурилиш техникаси юкланган 8 та 40 футлик контейнердан иборат бўлиб, у Ланчжоу станциясидан жўнаб, "Хитой – Қирғизистон – Ўзбекистон – Тожикистон" мультимодал транспорт коридори орқали Душанбе-2 станциясига етказилиши режалаштирилган.
Йўналишнинг умумий масофаси 3 500 километрдан ортиқни ташкил этиб, юкларни етказишнинг транзит муддати эса 18–20 кун этиб белгиланган.
“Ўзбекистон темир йўллари” АЖнинг логистика соҳасидаги ташаббусларни қўллаб-қувватлаши натижасида ушбу мультимодал йўналиш бўйлаб тариф имтиёзлари ўрнатилган.
Ушбу пилот лойиҳа эса компаниянинг Хитой – Марказий Осиё йўналишида барқарор ва мунтазам контейнер ташувларини йўлга қўйиш бўйича амалий салоҳиятини тасдиқлайди.
«Ўзтемирйўлконтейнер» АЖ халқаро логистика занжирларини кенгайтириш, янги транспорт коридорларини ривожлантириш ҳамда ҳамкорлар учун ишончли ва самарали ташув хизматларини такомиллаштириш бўйича фаолиятини изчил давом эттиради.
