Тошкент, Ўзбекистон — Alif компанияси 5 миллион доллар миқдоридаги сукукни муваффақиятли жойлаштирди. Бу ҳақда компания бош директори Нуриддин Лафизов ўзининг LinkedIn саҳифасида маълум қилди.
«Биз Alif компаниясининг биринчи хусусий сукук жойлаштириш битимини якунлаб, умумий қиймати 50 миллион долларга мўлжалланган дастур доирасида 5 миллион долларлик қимматли қоғозларни чиқардик», — деб ёзди у.
Маълумотларга кўра, мазкур молиявий инструмент сукук аль-Мудораба модели асосида тузилган бўлиб, инвесторларга Alif компаниясининг Ўзбекистондаги кейинги ривожланиш жараёнларида иштирок этиш имкониятини тақдим этади. Бу эса тўлиқ ислом молияси меъёрлари асосида амалга оширилмоқда.
«Бу битим Марказий Осиёни халқаро ислом молиявий бозорининг очиқ ва ишончли иштирокчиси сифатида тан олиниши йўлидаги муҳим қадам ҳисобланади», — дея таъкидлади Лафизов.
У шунингдек, лойиҳанинг ҳамкорлари — Amber Investments Ltd, CBH Compagnie Bancaire Helvétique SA, Morgan, Lewis & Bockius LLP ва Alhamd Shariah компанияларига битимни тузишда кўрсатган ёрдами ва қўллаб-қувватлаши учун миннатдорлик билдирди.
