Тошкент, Ўзбекистон — Американинг eBay компанияси Ўзбекистонда расман солиқ тўловчи сифатида рўйхатдан ўтди.
Эндиликда компания қўшилган қиймат солиғи (ҚҚС) тўлайди.
eBay билан бирга хорижий интернет-компаниялар учун махсус солиқ идорасида Netflix, Amazon, Google, Apple, Zoom каби йирик компаниялар ҳам рўйхатдан ўтган.
Ҳозирги кунда жами 64 та хорижий компания Ўзбекистонда ҚҚС тўлайди.
Давлат солиқ қўмитаси маълумотига кўра, 2024 йилнинг январь-сентябрь ойларида Ўзбекистон ҳудудида электрон хизматлар кўрсатган 61 та хорижий компания мамлакат бюджетига 101,9 миллиард сўм миқдорида солиқ тўлаган.
Бу ўтган йилнинг шу даврига нисбатан 2,1 баравар кўпдир.
Шунингдек, 2024 йил декабрь ойида Ўзбекистонда электрон тижорат хизматлари кўрсатувчи компаниялар учун янги талаблар жорий этилганини таъкидлаш лозим.
Энди электрон тижорат хизматлари кўрсатувчи барча компаниялар Ўзбекистонда юридик шахс сифатида рўйхатдан ўтишлари шарт. eBay ва Amazon каби йирик компанияларнинг ҳали мамлакатда ваколатхонаси йўқ, бу эса уларнинг маҳаллий бозордаги кейинги фаолияти борасида маълум бир ноаниқликни юзага келтирмоқда.
