Тошкент, Ўзбекистон — Sustainable Fitch халқаро рейтинг агентлиги Ўзбекистоннинг энг йирик тоғ-кон ва металлургия корхоналари — «НКМК» АЖ ва «ОКМК» АЖнинг барқарор ривожланиш рейтингларини (Entity Rating) «3» даражасида тасдиқлади.
Шу билан бирга «НКМК» АЖнинг умумий баҳоси 51 баллдан 54 баллга, «ОКМК» АЖники эса 56 баллдан 59 баллга оширилди.
Агентликда таъкидланишича, ушбу натижалар компаниялар томонидан барқарор ривожланиш стратегияларининг амалга оширилиши ҳамда тоғ-кон ва металлургия саноатига хос экологик ва ижтимоий омилларни ҳисобга олган ҳолда олиб борилаётган ишларни акс эттиради.
Қайд этилишича, «НКМК» АЖ иссиқхона газлари чиқиндиларини камайтириш ҳамда табиий ресурслардан оқилона фойдаланиш бўйича чора-тадбирларни амалга оширмоқда.
«ОКМК» АЖ эса ишлаб чиқаришнинг углерод сиғимини камайтириш ва қайта тикланувчи энергия манбаларидан фойдаланишни кенгайтиришга қаратилган узоқ муддатли иқлим стратегиясини жорий этмоқда.
Шунингдек, экспертлар компанияларда корпоратив бошқарув тизими йўлга қўйилгани, молиявий ҳисоботларнинг шаффофлиги, рискларни бошқариш тизими ҳамда солиқ мажбуриятларининг ўз вақтида бажарилишини алоҳида қайд этдилар.
