Тошкент, Ўзбекистон — Тошкент шаҳрида «Ўзелтехсаноат» уюшмаси ва “ASL BELGISI” Миллий рақамли маркировкалаш тизими оператори — “CRPT TURON” ўртасида ўзаро ҳамкорлик тўғрисидаги меморандумнинг тантанали имзоланиши бўлиб ўтди. Ушбу воқеа томонлар ўртасидаги шериклик муносабатларини ривожлантиришда муҳим босқич ҳисобланади.
Имзоланган Меморандумнинг асосий мақсадлари қуйидагилардан иборат:
Ноқонуний товар айланмасига қарши курашиш;
Маиший техника бозорини рақамлаштириш даражасини ошириш;
Касбий тажриба ва билим алмашиш;
Маҳсулот айланмаси иштирокчилари билан қўшма тадбирларни ташкил этиш ва ўтказиш.
Ушбу ҳамкорлик доирасида томонлар товарларнинг ноқонуний айланиши белгилари ва фактлари тўғрисида маълумот алмашишга, конференциялар ва давра суҳбатлари каби қўшма тадбирларни ўтказишга, шунингдек, ваколатли давлат органлари учун Ўзбекистон Республикасининг товарларнинг ноқонуний айланишига қарши курашиш соҳасидаги қонунчилигини такомиллаштириш бўйича таклифлар ишлаб чиқишга келишиб олдилар.
Томонлар товар айирбошлашни рақамлаштириш ва маиший техника бозори шаффофлигини ошириш соҳасидаги умумий мақсадларга эришиш йўлида бундан буён ҳам самарали ҳамкорлик қилиш, билим алмашиш ва ҳаракатларни мувофиқлаштиришга тайёр эканликларини билдирдилар.
