Тошкент, Ўзбекистон — Ўзбекистонлик гроссмейстер Жавоҳир Синдаров Кипрда ўтаётган Номзодлар мусобақанинг тўртинчи турида америкалик Фабиано Каруанани мағлуб этиб, мусобақада якка пешқадамга айланди.
Ўзаро учрашувга қадар ҳар икки шахматчи бир хил натижага эга эди — 3 та партиядан 2,5 очкодан тўплаган. Синдаровнинг ғалабаси унга 4 та партиядан 3,5 очко жамғариш ва турнир жадвалида етакчиликни қўлга киритиш имконини берди.
Партия 36-юришда якунланди. Оқ дона билан ўйнаган Синдаров ўйин жараёнини ишонч билан назорат қилди, вақт устунлигидан унумли фойдаланди ва турнирнинг асосий фаворитларидан бири ҳисобланган рақибини мағлуб этишга эришди. Ҳал қилувчи вазият партия ўртасида юз берди, Каруана муваффақиятсиз юришни амалга оширганидан сўнг ўзбекистонлик шахматчи ташаббусни қўлга олди ва босимни босқичма-босқич кучайтириб, рақибига ҳеч қандай имконият қолдирмади.
Бу ғалаба Синдаров учун турнирдаги учинчи ғалаба бўлиб, якуний муваффақият учун жиддий даъвогарликни англатади. 3 апрель куни бўлиб ўтадиган бешинчи турда Синдаров америкалик гроссмейстер Ҳикару Накамурага қарши қора дона билан баҳс олиб боради.
2026 йилги Номзодлар мусобақаси 29 мартдан 15 апрелгача Кипрда ўтказилмоқда ва унда дунёнинг энг кучли саккиз нафар гроссмейстери, жумладан Накамура, Каруана ҳамда дебютант Синдаров иштирок этмоқда.
Иштирокчилар икки давра тизимида 500 минг евро мукофот жамғармаси ҳамда амалдаги жаҳон чемпиони — ҳиндистонлик Доммаражу Гукешга қарши ўйнаш ҳуқуқи учун курашмоқда.
Мусобақа регламентига кўра, классик вақт назорати қўлланилади ва 40-юришгача дуранг таклиф қилиш тақиқланган. Ғолиб 48 минг евро мукофотга эга бўлади, ҳар бир иштирокчи эса тўплаган ҳар ярим очко учун 3500 евродан олади.
