Тошкент, Ўзбекистон — Футбол бўйича Ўзбекистон миллий терма жамоаси БААда ўтказилган халқаро Al Ain International Cup турнирида Эрон жамоасини пенальтилар сериясида мағлуб этиб, мусобақа ғолиблигини қўлга киритди. Финал учрашувининг асосий вақти голларсиз — 0:0 ҳисобида якунланди.
Учрашувнинг 68-дақиқасида миллий терманинг ҳимоячиси, «Манчестер Сити» клуби ўйинчиси Абдуқодир Ҳусанов рақибнинг ҳужум комбинациясини тўхтатгани учун майдондан чиқарилди. Шунинг ортидан Эрон жамоаси бир неча хавфли вазият яратди, аммо улардан фойдалана олмади.
Пенальтилар сериясида ўзбек футболчилари ўзларини анча ишончли намоён этиб, 4:3 ҳисобида ғалаба қозондилар ва шу тариқа турнир кубогини қўлга киритдилар.
