Тошкент, Ўзбекистон — Тошкентда йўловчи оқими ортиб бормоқда. Шаҳарликлар жамоат транспортини тобора кўпроқ танлаяпти — бунинг ортидан қулайлик, хавфсизлик ва хизмат сифатига бўлган талаб ҳам табиий равишда юксалмоқда.
Давлат транспорт тизимини изчил равишда кучайтирмоқда: автобуслар парки кенгаймоқда, йўналишлар ва инфратузилма янгиланмоқда. Бу ўзгаришлар ўз навбатида қулай бекатлар, хавфсиз платформалар, тушунарли навигация ва туташ ҳудудлардаги тартиб каби тегишли шаҳар муҳитини тақозо этади.
Пойтахтдаги бекат инфратузилмасини тартибга солиш ва янгилаш бўйича ўтган йили бошланган ишлар бугун ҳам давом эттирилмоқда. Рақамли транспорт маркази ташкил этилганидан буён бу вазифа янги марказ мутахассислари ва ходимлари томонидан мувофиқлаштириб келинмоқда.
Аввалроқ, ЙҲТEМ мутахассислари пойтахтнинг энг тирбанд 472 км автомобиль йўлини аниқлагани ва устувор йўналишлар бўйича ишлар бошлангани ҳақида хабар берган эдик.
Биринчи босқичда 100 кмлик масофа қамраб олинди: 360 дан ортиқ бекат ва 190 та катта-кичик чорраҳа хатловдан ўтказилди.
Ўтказилган аудит натижалари жамоат транспорти йўналишида бекатлар ўрнида халқ тилида “тижорат дўконлари” деб аталадиган 110 та савдо объекти жойлашганини кўрсатди. Улардан 61 таси бекат мажмуаси ҳудудига эгалик қилиш ва уни тасарруф этиш ҳуқуқини тасдиқловчи ҳужжатларни тақдим эта олмаган. Уларнинг фаолиятига ҳуқуқий баҳо берилиб, тегишли чоралар кўрилади.
Шаҳар маъмуриятининг тегишли қарорига асосан барча бекатлар янгиланади. Рухсат берувчи ҳужжатларга эга тадбиркорларга савдо нуқталарини ўрнатиш учун бошқа жой ажратиш орқали компенсация тўлаш механизми кўзда тутилган.
Жаҳон амалиёти кўрсатганидек, жамоат транспорти бекатларининг замонавий концепциялари бекат ҳудудида савдо объектларининг бўлмаслигини, йўловчиларнинг транспортни эркин ва хавфсиз кутишини, платформаларнинг етарлича кенг бўлишини ҳамда тирбандлик юқори бўлганда уларни кенгайтириш имкониятини, шунингдек, инклюзив муҳит яратилишини назарда тутади.
