Тошкент, Ўзбекистон — Ўзбекистон Президенти Шавкат Мирзиёев Ўзбекистон ва Малайзия ҳукуматлари ўртасида жиноий ишлар бўйича ўзаро ҳуқуқий ёрдам тўғрисидаги шартномани ратификация қилиш ҳақидаги қонунни тасдиқлади.
Ҳужжат 2023 йил 8 июнь куни Тошкентда Ўзбекистон Бош прокурори Нигматилла Йўлдошев ва Малайзия Бош прокурорининг биринчи ўринбосари Ахмад Террирудин бин Моҳд Саллеҳ ўртасидаги учрашув натижаларига кўра имзоланган.
Шартнома жиноий ишлар бўйича тергов ўтказиш ва процессуал ҳаракатларни амалга оширишда ҳуқуқий асослар ва ҳамкорлик шартларини белгилайди. Унда сўровларнинг шакли ва мазмунига қўйиладиган талаблар, уларни бажариш тартиби, ёрдам кўрсатишдан бош тортиш асослари, шунингдек, олинган маълумот ва далиллардан фойдаланиш чекловлари акс этган.
Келишувнинг асосий жиҳатларидан бири қидирилаётган шахсларни аниқлаш ва уларнинг жойлашувини белгилашда ҳамкорлик қилишдир. Жумладан, агар сўров юборган томонда қидирилаётган шахснинг иккинчи давлат ҳудудида экани ҳақида асосли тахминлар мавжуд бўлса, қабул қилувчи томон миллий қонунчиликка мувофиқ унинг қидирувини амалга ошириш учун зарур чораларни кўриши шарт.
