Тошкент, Ўзбекистон — 2026 йил 1 апрелдан бошлаб Ўзбекистондаги давлат тиббиёт муассасалари беш кунлик иш режимига ўтди. Ушбу қарор Ўзбекистон Республикаси Президентининг 2025 йил 9 ноябрдаги «Тиббиёт ва фармацевтика ходимларини қўллаб-қувватлаш чора-тадбирлари тўғрисида»ги қарори доирасида қабул қилинган.
Тиббиёт муассасаларининг узлуксиз фаолиятини таъминлаш мақсадида байрам ва дам олиш кунларида навбатчиликлар жорий этилган.
Соғлиқни сақлаш вазирлиги давлат тиббиёт муассасаларида беш кунлик иш ҳафтасини ташкил этиш бўйича вақтинчалик тартибни тасдиқлади.
Тиббиёт ходимлари учун ҳафталик иш вақти меъёри 36 соатдан ошмайди. Худди шундай иш вақти давомийлиги кучли психоэмоционал ва интеллектуал зўриқиш шароитида ишлайдиган ходимлар учун ҳам белгиланган. Зарарли ёки хавфли шароитларда меҳнат қиладиганлар учун қисқартирилган иш ҳафтаси қўлланилади.
Тиббиёт ходимлари тоифасига кирмайдиган ходимлар учун ҳафталик иш вақти 40 соатни ташкил этади.
Поликлиникалар ва оилавий тиббиёт пунктларида иш жадвали душанбадан жумагача соат 08:00 дан 20:00 гача, шанба куни эса 08:00 дан 14:00 гача навбатчилик тарзида белгиланган. Янги соғлиқни сақлаш модели жорий этилган ҳудудларда асосий иш вақти 08:00 дан 16:00 гача бўлиб, қўшимча навбатчилик 16:00 дан 20:00 гача амалга оширилади.
Навбатчиликлар Соғлиқни сақлаш вазирлигининг 254-сонли буйруғига мувофиқ ташкил этилади.
Ходимларнинг иш ҳақи тўлиқ сақлаб қолинади, ички ҳужжатлар ва меҳнат шартномалари янги тартибга мувофиқлаштирилган.
Стационар муассасаларда навбатчиликлар доимий ҳисобланади, сменалар ва навбатчилик жадваллари барча ходимлар ўртасида адолатли тақсимланади.
