Тошкент, Ўзбекистон — Жорий йилнинг 28-30 апрель кунлари Олий таълим, фан ва инновациялар вазири ўринбосари Отабек Махкамов бошчилигидаги делегациясининг Хитой Халқ Республикасининг Шинжон-Уйғур автоном районига (ШУАР) амалга оширган хизмат сафари давомида икки томонлама алоқаларни янада кенгайтириш, истиқболли йўналишларда ўзаро манфаатли инвестиция лойиҳаларини муҳокама қилиш ҳамда минтақавий ҳамкорликни ривожлантириш мақсадида бир қатор ташкилотлар билан ҳамкорлик учрашувлари ташкил этилди ва кўплаб манфаатли келишувларга эришилди.
Хусусан:
«Тянфен» Синсзян қишлоқ хўжалиги илмий-техникавий компанияси билан озиқ-овқат хавфсизлигини таъминлаш учун мўлжалланган лаборатория маркази очилишига келишиб олинди ва битим имзоланди.
БМТнинг Савдо–сотиқ ва ривожланиш комиссияси (UNSTAD) эксперти ва Space Techtronic Industries Services (Shenzhen) Co., Ltd. вакиллари билан технологияларни Хитойдан Ўзбекистонга трансфер қилиш жараёнларини мувофиқлаштирувчи махсус марказ ташкил этишга келишилди.
Хитойнинг Xinjiang Beixin Road & Bridge Group Co., Ltd. компанияси билан академик алмашинув дастурларини ташкиллаштиришга келишилди.
Тянсзин қишлоқ хўжалиги университети билан ҳамкорликда аграр соҳадаги илмий тадқиқотлар ўтказиладиган марказ ташкил этиш ва “Янги Ўзбек-Хитой ландшафт дизайни” концепциясини яратиш ва бу йўналишда ҳамкорликни янада чуқурлаштириш юзасидан келишувга эришилди.
Хитойнинг Чанъан университети ўртасида талабалар алмашинуви ва халқаро ҳамкорликни ривожлантириш бўйича музокаралар бўлиб ўтди
Тошкент кимё-технология институти Янгиер филиали ҳамда Хитойнинг Чанъан университети ўртасида талабалар алмашинуви ва халқаро ҳамкорликни ривожлантириш бўйича музокаралар бўлиб ўтди. Хитой томонидан таклиф этилган дастурга кўра, 4 та бакалавриат йўналиши бўйича ҳар бир йўналишга 30 нафаргача талабани қабул қилиш режалаштирилган.
Пекин технология институтининг Тошкент шаҳридаги филиалини очиш масаласи муҳокама қилинди. Янги хорижий кампус таркибида бешта асосий факультет фаолият юритади: компьютер фанлари, машинасозлик ва автомобилсозлик, «яшил» энергетика, катта маълумотлар (Bid Data), сунъий интеллект ва киберхавфсизлик.
