Тошкент, Ўзбекистон — Жорий йилнинг 16 апрель куни Вашингтон шаҳрида Жаҳон банки гуруҳи ва Халқаро валюта жамғармасининг Баҳорги йиғилишлари доирасида “Давлат-хусусий шериклик (ППП) бўйича глобал сабоқлар” мавзусида давра суҳбати бўлиб ўтди.
Мазкур тадбир Georgetown Psaros Center for Financial Markets and Policy томонидан ташкил этилиб, унда халқаро молия институтлари, инвестиция банклари, йирик инфратузилма компаниялари ҳамда давлат органлари вакиллари иштирок этди.
Давра суҳбатида Ўзбекистон Республикаси Иқтисодиёт ва молия вазири ўринбосари Илҳом Умрзаков ҳам қатнашиб, мамлакатимизда амалга оширилаётган иқтисодий ислоҳотлар, хусусан, давлат-хусусий шериклик механизмларини ривожлантириш, хусусий инвестицияларни жалб этиш ва инфратузилма лойиҳаларини молиялаштириш бўйича олиб борилаётган ишлар юзасидан фикр билдирди.
Тадбир давомида давлат-хусусий шериклик лойиҳаларини амалга оширишда учраётган асосий муаммолар, жумладан сиёсий ва тартибга солиш таваккалчиликлари, валюта ва молиявий рисклар, талаб ноаниқлиги ҳамда ESG омиллари муҳокама қилинди. Шу билан бирга, муваффақиятли ДХШ лойиҳалари тажрибаси, хусусий сектор иштирокини кенгайтириш механизмлари ва халқаро молия институтларининг роли юзасидан фикр алмашилди.
Шунингдек, инфратузилма соҳасида самарали ДХШ моделларини жорий этиш, банклар ва институционал инвесторлар ўртасидаги ҳамкорликни кучайтириш ҳамда лойиҳаларни тайёрлаш ва амалга ошириш сифатини ошириш бўйича тавсиялар ишлаб чиқилди.
Мазкур давра суҳбати глобал молия бозорлари ва давлат сиёсати чорраҳасида ечимлар ишлаб чиқишга қаратилган платформа сифатида хизмат қилиб, ривожланаётган давлатлар, жумладан Ўзбекистон учун хусусий капитални жалб этиш ва иқтисодий ўсишни таъминлашда муҳим аҳамият касб этади.
